Formohet një koalicion i cili do të luftojë politikat e Apple dhe Google me dyqanet e aplikacioneve

Disa kompani të cilat krijojnë aplikacione në iOS formuan një koalicion për tu përballur me Apple lidhur me politikat e saj të App Store.

Koalicioni i përbërë nga disa krijues aplikacionesh, u themelua nga Spotify, Epic Games dhe Tinder. Ato pretendojnë se taksa e Apple dëmton konsumatorët dhe shkatërron inovacionin duke e kritikuar si politikë anti-konkurruese.

Apple i ka mohuar vazhdimisht këto akuza. Google që aplikon politika të ngjashme me Play Store nuk është përmendur në deklaratën e përbashkët të anëtarëve të këtij koalicioni por përmendet në uebsajt dhe kritikohet për të njëjtat arsye.

Koalicioni është themeluar si një organizatë e pavarur jo-fitimprurëse dhe është e hapur për të gjithë zhvilluesit që duan ti bashkohen.

Në mesin e 11 pikave që ky koalicion synon të arrijë spikatin tre prej tyre:

• Apple dhe Google janë përfshirë në praktika anti-konkurruese të cilat kufizojnë zhvillimin e produkteve dhe përmirësimin e eksperiencës së konsumatorit
• Tarifa 30% që Apple dhe Google merr prej shitjeve dixhitale është një taksë kundër inovacionit
• Konsumatorët nuk kanë mundësi zgjedhjeje, nuk ka konkurrencë, nuk ka mbështetje

Epic Games është përfshirë në një luftë me Apple lidhur me sistemin e pagesave. Spotify akuzon Apple për praktika anti-konkurruese.

Basecamp, kompania pas aplikacionit Hey u përfshi në një përplasje të egër me Apple dhe politikat e App Store. Prepear është tjetër kompani e cila gjendet në një betejë ligjore me Apple ndërsa ky i fundit akuzon për kopjim të logos. /PCWorld Albanian