Lajmet

Gjykata suedeze refuzon kërkesën për burgosjen e Assange

PCWorld Albanian Nga: PCWorld Albanian
Publikuar , 04 Qershor 2019
0
Shtetet e Bashkuara po ashtu e kërkojnë ekstradimin e Assanges, nën akuzat se ai ka publikuar informacione të klasifikuara. Gjykata suedeze refuzon kërkesën për burgosjen e Assange

Një gjykatë në Suedi refuzoi kërkesën për të lëshuar urdhër për paraburgimin në mungesë të bashkëthemeluesit të ueb-faqes WikiLeaks, Julian Assange, në lidhje me një rast të përdhunimit, më 2010.

Prokurorët në Suedi e paraqitën kërkesën në gjykatën e qytetit Upsala.

Paraburgimi në mungesë i Assange, i cili aktualisht ndodhet në burg në Britani, do të ishte hapi i parë drejt kërkesës për ekstradimin e tij nga Britania.

Vendimi gjyqësor i 3 qershorit, megjithatë, nuk do të thotë se hetimet paraprake në Suedi duhet të braktisen.

Assange, 47 vjeç, e mohon akuzën për përdhunim shkruan Radio Evropa Lirë.

Ai është arrestuar nga policia britanike në prill, pasi ka kaluar shtatë vjet në Ambasadën e Ekuadorit në Londër.

Ai është dënuar më pas me 50 javë në burg për shkelje të kushteve të lirimit me kusht.

Në maj, autoritetet suedeze kanë rihapur hetimet për përdhunimin e dyshuar, të cilat janë mbyllur në vitin 2017, pasi Assange ka qenë i strehuar në Ambasadën e Ekuadorit.

Shtetet e Bashkuara po ashtu e kërkojnë ekstradimin e Assange, nën akuzat se ai ka publikuar informacione të klasifikuara.

Më 30 maj, autoritetet britanike kanë shtyrë një seancë dëgjimore për kërkesën e SHBA-së për ekstradim, pasi Assange ishte shumë i sëmurë për të marrë pjesë në të përmes video-lidhjes.

Seanca e re dëgjimore është caktuar për 12 qershor. /PCWorld Albanian

LEXO EDHE:  Samsung padit LG për një reklamë të "pahijshme"

Lajmet e fundit>