Lajmet

Hapi siparin Akademia Ndërkombëtare Verore organizuar nga Universiteti për Biznes dhe Teknologji

Publikuar , 05 Korrik 2017
Kjo akademi po mbahet me qëllim të trajnimit dhe përgatitjes së profesionistëve të ardhshëm në fushën e sigurisë kibernetike Hapi siparin Akademia Ndërkombëtare Verore organizuar nga Universiteti për Biznes dhe Teknologji Photo Source: ICTSmedia

Ditën e Mërkure hapi siparin Akademia Ndërkombëtare Verore organizuar nga Universiteti për Biznes dhe Teknologji e cila do të mbahet në datat 5-19 Korrik.

Në hapjen zyrtare të këtij organizimi morën pjesë dhjetëra profesorë dhe përfaqësues nga kompani të specializuara në çështjet e sigurisë kibernetike.

Në këtë aktivitet nderuan me pjesëmarrjen e tyre profesori nga Universiteti i Bloomsburg dhe hakeri i njohur ndërkombëtarisht Prof. Dr. Philip Polstra, profesori i UBT-së Prof. Dr. Zhilbert Tafa, menaxheri i UBT-CERT Atdhe Buja, përfaqësuesi i kompanisë “Rrota” Ardian Veliu, përfaqësuesja e KOSTT Arjeta Gashi dhe përfaqësuesi i kompanisë Formon Arianit Zabërgja.

     Në ditën e parë të këtij organizimi, për studentët e SHKI-së do të ligjërojnë hakeri Philip Polstra dhe menaxheri i UBT-CERT, Atdhe Buja, të cilët do ta trajtojnë temën më titull: “Digital Forensics with Open Source Tools – Linux”.

Prof. Dr. Philip Polstra është një haker i njohur ndërkombëtarisht. Ai ka folur në shumë konferenca në mbarë botën, përfshirë fjalimet në Blackhat, DEFCON, 44CON, GrrCON, ForenSecure dhe B-sides Iowa.

Puna e tij e fundit në zhvillimin e harduerëve për hakerat, bazuar në familjen e pajisjeve të Beagle, është dokumentuar në librin e tij “Hacking and Penetration Testing With Low Power Devices” (Syngress, 2015). Aktiviteti i hapjes filloi në ora 11:00 pranë Universitetit për Biznes dhe Teknologji.

Kjo akademi po mbahet me qëllim të trajnimit dhe përgatitjes së profesionistëve të ardhshëm në fushën e sigurisë kibernetike, trajnime këto që po mbahen nga ekspertët më të mirë të fushës.

Më 7 Korrik 2017, kësaj akademie do ti bashkohen me ligjërimet e tyre, dy fituesit e çmimit të Mobilitetit të Vitit në dy edicionet e fundit të Albanian ICT Awards, Genti Selenica nga Baboon dhe Albi Zhulali nga Softmogul. Ata do të flasin rreth Inovacioneve të Vitit 2017 dhe të Ardhmes së Teknologjisë.

LEXO EDHE:  Grupi i dytë fillon rrugëtimin në Hoxton Academy, aplikimet të hapura deri më 13 Maj

Akademia Ndërkombëtare Verore organizohet nga Universiteti për Biznes dhe Teknologji me mbështetjen e UBT-CERT, shtëpisë Botuese ICTSmedia, Autoritetit Kombëtar për Certifikimin Elektronik dhe Sigurinë Kibernetike dhe Sentry Cyber Security.

Gjatë akademisë do të mbulohen tema si: Inxhinieria e Sistemeve, Dynamic Web, Sistemet e Komunikimit në Windows dhe Linux Forensics, Informatika Cloud, Siguria e Rrjeteve, Hakimi dhe Sistemet Dixhitale, Gaming dhe Privatësia dhe Siguria e të Dhënave. /PCWorld Albanian