Biznes

Kompania Hungareze 4iG blen ALBtelecom

Nga: PCWorld
Publikuar , 08 Dhjetor 2021
Në fund të vitit 2020, kompania kishte 924 punonjës. Kompania Hungareze 4iG blen ALBtelecom

Operatori hungarez I telekomunikacioneve, 4iG PLC njoftoi se ka nënshkruar një marrëveshje përfundimtare për të blerë 80.27% të aksioneve të ALBtelecom. Vlera e transaksionit nuk është bërë e ditur.

Sipas njoftimit zyrtar të 4iG, Albtelecom  është operatori lider në Shqipëri i internetit dhe TV me linjë fikse, zotëruesi më i madh i një rrjeti fibër në vend dhe një operator celular me një rrjet të rëndësishëm. Blerja është një tjetër hap i rëndësishëm në strategjinë e zgjerimit të Grupit 4iG në Ballkanin Perëndimor: grupi zgjerohet në një vend tjetër në rajon si një investitor strategjik, duke sjellë shërbimet e tij të telekomunikacionit dhe dixhitale. Falë transaksionit, Çalik Holding, një nga konglomeratet më të mëdha të Turqisë, do të bëhet një investitor institucional në 4iG. Blerja e shumicës kontrolluese të aksioneve të ALBtelecom pritet të mbyllet në janar 2022, me miratimin e autoriteteve shqiptare, thuhet në njoftim.

4iG njoftoi se po zgjeron portofolin e saj të telekomunikacionit në rajonin e Ballkanit Perëndimor, pas hyrjes në një marrëveshje përfundimtare shitblerjeje për të blerë 80.27% të aksioneve në ALBtelecom nga Cetel Telecom, një degë, ku shumica e aksioneve është në pronësi të Çalik Holding të Turqisë. Shteti shqiptar do të vazhdojë të ushtrojë të drejtat e tij të pronësisë minoritare në kompani nëpërmjet Ministrisë Shqiptare të Financave dhe Ekonomisë (13.78%) dhe Postës Shqiptare (2.47%).

Sipas njoftimit, aksionet e ALBtelecom do të përvetësohen nga 4iG në një transaksion me shumë hapa, i cili do të mundësojë që Çalik Holding, një nga konglomeratet më të mëdha të Turqisë, të blejë një pjesëa prej rreth 3,2% në grupin hungarez të info-komunikimit, si investitor institucional. Shteti shqiptar mbetet aksioner i përbashkët me 4iG në ALBtelecom. Bashkëpunimi mund të hapë mundësi të mëtejshme biznesi të përbashkëta për Çalik Holding dhe 4iG në Ballkan dhe Azinë Qendrore.

LEXO EDHE:  Samsung do të heqë së shpejti reklamat nga smartfonët

“ALBtelecom është një ofrues telekomunikacioni me potencial të madh rritjeje. Blerja është një hap i rëndësishëm për zgjerimin tonë në sektorin e telekomunikacionit të Ballkanit Perëndimor, i cili mund të hapë mundësi të mëtejshme për ne në tregjet shqiptare të telekomunikacionit dhe IT-së.” – tha Z. Gellért Jászai, Kryetar dhe CEO i 4iG, pas nënshkrimit të marrëveshjes. “Ne kemi ardhur në vend si një investitor strategjik, ku duam të jemi prezent në afat të gjatë në ofrimin e shërbimeve me cilësi të lartë për klientët me pakicë dhe korporata. Blerja jonë është një hap i rëndësishëm përmes synimeve tona strategjike dhe ne jemi të përkushtuar ndaj zhvillimit të sektorit shqiptar të telekomit dhe përpjekjeve të Shqipërisë për dixhitalizimin”- theksoi CEO.

“Jemi të kënaqur që ALBtelecom do të zotërohet nga një investitor strategjik i përkushtuar ndaj kompanisë. Ky është hapi i parë në zhvillimin e partneritetit tonë strategjik me 4iG Group, i cili mund të ofrojë mundësi të mëtejshme biznesi për të dyja kompanitë tona në të ardhmen.” – tha për marrëveshjen z.Ahmet Çalik, President i Çalik Holding.

ALBtelecom që u themelua në vitin 1912 dhe sot ka 743 punonjës është i pranishëm në të gjitha fushat e telekomunikacionit (televizion, zë fiks, zë celular dhe internet broadband). Vitin e kaluar, kompania arriti një EBITDA prej 17.4 milionë euro me të ardhura prej 57.9 milionë euro. Kompania është ofruesi më i madh i telekomunikacioneve fikse në Shqipëri me 168,000 abonentë, 129,000 në internet dhe 71,000 abonentë TV dhe operatori i tretë më i madh celular me 420,000 abonentë celularë. ALBtelecom ka një infrastrukturë të gjerë telekomunikacioni: përveç rrjetit më të madh të fibrave optike të Shqipërisë prej 4500 kilometrash, kompania ka gjithashtu mbulimin më të madh të rrjetit optik gjeografikisht (GPON). Përveç infrastrukturës me kabllo, ALBtelecom ka edhe 450 stacione ripërsëritëse celulare, shumë prej të cilave ofrojnë lidhje me rrjetin nëpërmjet rrjetit të vet optik. Kompania nisi shërbimet e saj të bazuara në LTE (4G) në 2015 dhe rinovoi frekuencat e saj 2G/3G në 2019, e cila zakonisht kërkohet për të ofruar lidhje celulare në zonat malore. ALBtelecom ka 88 dyqane ekskluzive në mbarë vendin, përfundon njoftimi zyrtar.

LEXO EDHE:  Shteti hungarez bëhet aksioner në ALBtelecom dhe ONE

4iG është një kompani që e ka origjinën në vitin 1995 dhe në portofolin e vet përfshin ofrimin e pajisjeve teknologjike dhe shërbimeve të lidhura me komunikimet satelitore, sistemet e menaxhimit të proceseve të punës për bizneset, ndërtimit dhe operimin e qendrave të të dhënave, etj. Prej vitit 2004, ajo është e listuar në Bursën e Budapestit, ndërsa aksioneri kontrollues, me 61% të aksioneve, është biznesmeni hungarez Gellért Jászai, njëkohësisht kryetar i Bordit të Drejtorëve dhe Drejtor i Përgjithshëm i kompanisë.

Për vitin 2020, 4iG raportoi të ardhura totale në vlerën e 57.7 miliardë forintave hungareze (rreth 161 milionë euro) dhe një fitim para tatimit, amortizimit dhe zhvlerësimit (EBITDA) 5.05 miliardë forinta hungareze (rreth 14 milionë euro). Në fund të vitit 2020, kompania kishte 924 punonjës.

/Monitor