Lajmet

Microsoft dhe ICTSmedia organizuan në Tiranë eventin DigiGirlz për inkurajimin e vajzave në fushën e ICT-së

Publikuar , 28 Mars 2018
0
Pjesa e parë e eventit u përqëndrua tek të ftuarit e panelit të cilët u bënë pjesë e këtij organizimi duke ndarë me pjesëmarrësit eksperiencën e tyre në ICT. Të ftuarat ishin tre femra të cilat luajnë një rol të rëndësishëm në zhvillimin e fushës së teknologjisë në vend edhe në rajon. Microsoft dhe ICTSmedia organizuan në Tiranë eventin DigiGirlz për inkurajimin e vajzave në fushën e ICT-së

Dje pasdite u organizua eventi DigiGirlz pranë Universitetit Politeknik të Tiranës i cili kishte si qëllim përfshirjen dhe nxitjen e vajzave në fushën e ICT. Ky event u bë i mundur në sajë të bashkëpunimit të ICTSmedia dhe Microsoft, me mbështetjen e iniciativës rinore Code in Rose.

DigiGirlz është një program për të rinjtë i krijuar nga Microsoft në mënyrë që të njohë vajzat e shkollave të mesme e të larta me mundësitë e reja që u ofrohen në fushën e teknologjisë. Me një pjesëmarrje dhe interes mjaft të lartë nga vajzat ky event përfshiu nxënëse të shkollave të mesme të Tiranës dhe gjithashtu të shkollave profesionale në qytetet e tjera të vendit. Pjesëmarrje të lartë pati edhe nga studente të degës së informatikës dhe shkencave elektronike.

Pjesa e parë e eventit u përqendrua tek të ftuarit e panelit të cilët u bënë pjesë e këtij organizimi duke ndarë me pjesëmarrësit eksperiencën e tyre në ICT. Të ftuarat ishin tre femra të cilat luajnë një rol të rëndësishëm në zhvillimin e fushës së teknologjisë në vend edhe në rajon.

Linda Shomo, përfaqësuese e kompanisë EasyPay, foli mbi përvojën e saj duke motivuar vajzat në vazhdimin e zgjedhjes që ato kanë bërë. “E ardhmja është teknologjia dhe digjitalizimi, në 2020 shumë profesione do të zhduken dhe do të zëvendësohen nga informaticienë, programues e zhvillues, prandaj duhet të punoni fort” – u shpreh ajo.

Një femër tjetër mjaft e suksesshme, historia e së cilës ngjalli mjaft interes tek pjesëmarrëset, ishte edhe Anila Hoxha, e cila mban rolin e Drejtoreshës së Sigurisë në bankën Raiffeisen.  Anila rastësisht kishte zgjedhur të studionte për shkenca kompjuterike dhe më pas kishte kuptuar që ishte profesioni më i dashur për të. Paneli përfaqësohej edhe nga Alborita Mehana, përfaqësuese e Girls Coding Kosova, duke ndarë me vajzat përvojën e saj në fushën e programimit dhe kodimit.

LEXO EDHE:  Twitter rikthen rendin kronologjik të cicërimave

Aktiviteti vijoi me prezantime të ideve inovative nga vajzat pjesëmarrëse ku spikatën mjaft ide interesante, disa prej të cilave ishin në fazë implementimi. Ideja fituese e cila u përzgjodh nga vetë vajzat ishte Albatrack dhe konsistonte në krijimin e një platformë turizmi ku të përfshiheshin të gjitha ofertat dhe mundësitë për zhvillimin e turizmit në Shqipëri duke i ardhur kështu në ndihmë turistëve.

Ide të tjera mjaft interesante ishin C-Girls, website për nxitjen e vajzave në zgjedhjen e IT si profesion dhe lidhjen e tyre me tregun e kësaj fushe, Motivo.com, SHIP IT etj. Grupit me idenë fituese iu dha mundësia e një vizite pranë zyrave të Microsoft në Tiranë ku do të mund të shikonin dhe njiheshin më nga afër me mundësitë që jep kjo kompani. /PCWorld Albanian

Lajmet e fundit>