Biznes

SHBA-ve nuk i pëlqen plani i Francës për të tatuar gjigandët e teknologjisë

PCWorld Albanian Nga: PCWorld Albanian
Publikuar , 11 Korrik 2019
0
Me taksën e re në Francë, çdo kompani digjitale me të ardhura prej më shumë se 750 milionë eurosh - prej të cilave së paku 25 milionë gjenerojnë në Francë - do të jetë subjekt i tatimit. SHBA-ve nuk i pëlqen plani i Francës për të tatuar gjigandët e teknologjisë

Presidenti i Shteteve të Bashkuara, Donald Trump, urdhëroi një hetim mbi taksën e planifikuar të Francës për gjigantët e teknologjisë – një masë që mund të rezultojë me tarifa hakmarrëse.

Përfaqësuesi i tij tregtar tha se SHBA-ja është “shumë e shqetësuar” se tatimi “synon padrejtësisht kompanitë amerikane”.

Të enjten, Parlamenti i Francës pritet të miratojë një taksë prej 3% për të ardhurat e bëra nga kompani si Google dhe Facebook, brenda Francës.

Franca argumenton se këto firma aktualisht i shfrytëzojnë vakumet e taksave globale shkruan Radio Evropa e Lirë.

Gjigantët e teknologjisë mund t’i vendosin selitë e tyre në vendet me taksa të ulëta, ku deklarojnë fitime të bëra në mbarë botën, duke minimizuar kështu faturën e tyre tatimore.

Me taksën e re në Francë, çdo kompani digjitale me të ardhura prej më shumë se 750 milionë eurosh – prej të cilave së paku 25 milionë gjenerojnë në Francë – do të jetë subjekt i tatimit.

“Trump ka urdhëruar që ne t’i hetojmë efektet e këtij legjislacioni dhe të përcaktojmë nëse është diskriminues apo i paarsyeshëm dhe ngarkon apo kufizon tregtinë e Shteteve të Bashkuara”, tha përmes një deklarate përfaqësuesi amerikan i tregtisë, Robert Lighthizer.

Hetimi i SHBA-së mund të hapë rrugën për tarifa ndëshkuese, që Trump i ka ndërmarrë në disa raste që nga marrja e detyrës, në janar të vitit 2017. /PCWorld Albanian

LEXO EDHE:  WhatsApp feston 10 vjetorin e themelimit

Lajmet e fundit>